Kannski 2,9%

Þá er nú ekki víst að framhaldsskólanemar leggist á koddann alveg strax. Sennilega þætti þeim mörgum í lagi að fá svona vikufrí, en eftir það hellist yfir menn þetta undarlega tóm, þegar maður hefur ekki félaga sína á næstu grösum og dagarnir verða langir og leiðinlegir. Í Hávamálum er sagt að maður sé manns gaman og það á svo sannarlega við í skólanum, þótt krakkarnir séu stundum að fjasa um leiðinlega kennara, fúla dönsku og annað slíkt. 

Þegar fólk lítur til baka þá voru einmitt árin í framhaldsskólanum bestu ár ævinnar.

Verkfall hefst á morgun

Þegar goshvernum var lokað!

Það eru sennilega ekkert margir lengur, sem vita að einhverjum skemmtilegasta goshver landsins var lokað fyrir löngu síðan. Það væri gaman, ef einhver gæti upplýst mig um það hvort hann gýs enn í dag. Fyrir margt löngu, þegar ég var í námi sem leiðsögumaður þá komum við í Hveragerði og bílstjórinn laumaðist með mig að húsagarði. Þar losaði hann um heljarmikið járnlok og eftir smástund kom þetta líka fallega gos. Hann sagði mér að húsráðendur hefðu bæði verið orðnir leiðir á því að hafa fólk við húsið alla daga og einnig var víst glerið í húsinu ekki fallegt. Ef þessi hver er nú enn virkur í húsagarði í Hveragerði þá vildi ég gjarnan fá að kaupa húsið og selja inn.

Heimilt að loka Geysissvæðinu

Svefngenglar með síma!

Hvar sem maður kemur ræða kennarar og aðrir uppalendur um allt þetta snjalldót og vandann, sem það skapar. Þegar viðkomandi uppalandi hefur kíkt í símann sinn þá segir hann manni að þessi vandi sé svo stórkostlegur hjá börnum og unglingum að eitthvað þurfi að gera strax. Að svo mæltu kíkir uppalandinn á símann sinn smástund. 

Staðreyndin er sú eins og allir vita að fólk er oft ráfandi eins og svefngenglar starandi á upplýstan skjá algjörlega út úr heiminum.  Það er stórkostlegt að einhver hafi nú riðið á vaðið og hreinlega bannað þetta dót í keppnisferðum. Mikið væri gott ef skólar gripu tækfærið og segðu: Hingað og ekki lengra.

Banna alla síma í keppnisferðum

Er ekki frjálst að labba um eigið land?

Ég hélt í sakleysi mínu að til væru lög, sem heimiluðu fólki að labba um landið. Ég minnist þess meira að segja að hafa heyrt að landeigendur ættu ekki rétt á að hindra fólk í að tína upp í sig ber á þeirra landareign. Ég þekki lögin reyndar ekki nógu vel, en kannski er það svo að menn geti bara girt af ákveðin svæði og selt inn á þau. En Ragnheiður Elín hlýtur að láta skoða þetta vel og vandlega.

„Kvótakóngar íslenskrar ferðaþjónustu“

Þingvellir fyrir ALVÖRU veiðimenn

Flestir sem eru að  byrja veiðar láta sér nægja flotholt og maðk. Þeir eru einnig ófáir pabbarnir, sem hafa tekið börnin sín með til Þingvalla og leyft þeim að hafa sína stöng í rólegheitum með flotholti á meðan þeir hafa notað sínar aðferðir.

Það er merkilegt að þetta geti ekki verið óbreytt, en nú mun ákveðið að enginn megi veiða í Þingvallavatni í maímánuði nema á flugu. Til þess að fá fólk til að gleypa við þessu var ákveðið að nú megi þessir ALVÖRU veiðimenn byrja þann 20. apríl.
Enn spyr ég: Fyrir hverja eru Þingvellir?

Banna böll í framhaldsskólum

Það eru margir stjórnendur framhaldsskóla orðnir hundleiðir á böllum. Einn sagði reyndar að það væri langbest að vera algjörlega laus við þennan ófögnuð bæði innan skóla og utan. Hann sagði að þessu fylgdi ótrúleg ónæði, ölvun og vesen.  Annar sagði að um leið og talað væri um böll þá myndaðist einhver óskilgreindur þrýstingur og væri hreinlega ekki kennsluhæft þann daginn.

Varðstjóri komst þannig að orði að fólk væri slegið blindu ef það talaði um skólaböll og héldi að slíkt fyrirbæri væri eitthvað frábrugðið venjulegum böllum. Eina ráðið virðist því að banna böll í framhaldsskólum. 

„Allir eru sótölvaðir á böllum“

Sofðu unga ástin mín !

Ef menn hanga inni og komast hvergi, þá er hér lítið ljóð við lagið: Sofðu unga ástin mín. Hægt að raula þetta á meðan verstu hviðurnar ganga yfir

 

Nú er úti veður vott,

verst á Kjalarnesi.

Við Hafnarfjallið hreint ei gott

hjólhýsi þar fauk á brott

og upp til himins hurfu Brúnn og Blesi.

Út á mel og upp við fjall

ægilegar hviður.

Í Stykkishómi stærðar kall

stóð við gamlan fiskihjall

Þeir koma eflaust aldrei aftur niður.

Alveg fékk ég upp í kok

aldrei sól og blíða?

Áðan heyrði um fjárhúsfok

svo fuku hænur upp á Ok.

Hollast mun því heimleiðis að skríða.

Spá 40-50 metrum á sekúndu

Leikhús lögreglunnar!

Vegfarandi: „Ég er hérna á veginum við Hveragerði og það er hlið fyrir veginum“

Lögregla: „Ertu ekki að meina yfir veginn?"

Vegfarandi: „Hvaða tittlingaskítur er þetta?"

Lögregla: „Er þetta hlið ekki frekar fyrir þér en fyrir veginum. Hann ætlar mér vitanlega ekki að fara neitt.

Vegfarandi: „Ég er búinn að kaupa miða í óperuna og nú get ég ekki notað þá.“

Lögregla: „Ertu að meina óperuna Ragnheiði í Eldborgarsalnum - tvo miða?.“

Vegfarandi: „Já, og konan mín grætur hér við hliðina á mér“

Lögregla: „Já, það gráta nú víst margir á þessari sýningu. Manstu nokkuð númer hvað sætin ykkar eru?“

Vegfarandi: „Já á 6. bekk númer 26 og 27

Lögregla: „Heyrðu, ég má því miður ekki vera að ræða við þig lengur, en ég er einmitt að loka hér í Þrengslunum líka og þarf að drífa mig í bæinn. Þú ferð bara heim og horfir á góða mynd."

„Alltaf sama ruglið í löggunum“

Fátæk þjóð í vanda!

Fyrir hrun þá fannst manni fólk haga sér eins og vitleysingar í peningamálum. Um þjóðvegi landsins æddu landcruiserar með ótrúlega stór hjólhýsi í eftirdragi helgi eftir helgi. Maður spurði sjálfan sig hvaðan fólk hefði alla þessa peninga og síðar kom auðvitað í ljós að það var engin inneign fyrir þessu öllu.

Nú er öldin önnur. Þjóðin er fátæk og í vanda og sárt til þess að hugsa hversu margir sitja heima og treysta sér ekki til að kaupa miða á ódýra tónleika eins og hjá Timberlake. En svona er þetta nú einu sinni. Það er þó gott að þjóðin sýnir nú aðhald og skynsemi í peningamálum.

Seldist upp á Justin á 12 mínútum

Vinir vina sinna!

Það er ómetanlegt að eiga góða vini. Það er skemmtileg tilviljun að bæði í gær og dag birtist frétt af konum, sem fara úr landi til að styðja aðra. Það hlýtur að vera merkileg lífsreynsla fyrir mann, sem hefur setið lengi í fangelsi að fá heimsókn frá mæðgum, sem hafa skrifast á við hann í nokkur ár. 

Sama á auðvitað við um Pistorius, sem nú fær endurgoldinn styrk, sem hann sýndi ungum íslenskum manni. Ég leyfi mér að óska þessum konum alls hins besta. Það er nauðsynlegt hverjum manni að eiga vini sem styðja þá í blíðu og stríðu. 

Ebba styður Pistorius í réttarsal

Hélt kannski að þessu mundi linna eitt augnablik

Það er bráðnauðsynlegt að þessum vælugangi í garð karla verði hætt. Ef ekki þá munu allar stúlkur landsins verða skíthræddar við alla karla og halda að þeir séu sífellt að reyna að klekkja á konum.

Stundum liggur ónefndum konum svo mikið á að sanna þetta að þær fara bara sjálfar að blogga undir dulnefni til að sýna hversu hroðalegir karlar eru í raun. 

Þessi fyrirsögn er dæmigerð.  Þarna eru konur með dagskrá þar sem konur eru í aðalhlutverki. Hverning yrði fyrirsögnin ef karlar væru með dagskrá þar sem það væri auglýst að aðaláherslan væru á verk karla. Þeir yrðu fordæmdir í einum grænum og fyrirsögnin gæti aldrei orðið:Kvennahúmor sem beinist að körlum

„Karlahúmor sem beinist að konum“

Hvers eiga karlar að gjalda?

Einu sinni enn berast af því fréttir að kona hafi rekið karl úr starfi án nokkurrar skýringar. Í þessum tilfellum reyna karlarnir að ná rétti sínum, en allir hugsa að viðkomandi hljóti að hafa gert eitthvað af sér. Þið hljótið að muna eftir svipuðum fréttum frá undanförnum árum og í öllum tilfellum voru þeir sem sendu bréfin kvenkyns. Það er algjör lágmarkskrafa að vanda vel til bréfanna og skilgreina út í æsar hver orsökin er. Við karlar getum ekki lifað við það að fólk sé að ímynda sér allskyns hluti, sem eiga ekki við rök að styðjast. Konur geta ekki skýlt sér á bak við: Af því bara.  

 

P.s. Sé hér á bloggi Arnþórs Helgasonar að við erum innilega sammála. 

Konur sem hata konur

Hér gefst kærkomið tækifæri til að benda á það einu sinni enn að skæðasta vopn kvenna er andstyggilegt orðalag í garð annarra kvenna. Þetta er meðfæddur andskoti og engu virðist skipta hver stúlkan er. Ef þær sjá til dæmis aðra konu gefa kærasta sínum auga þá getur maður verið 100% viss um að eftir augnablik verði því laumað að kærastanum hvílík drusla hin konan sé og gjarnan bent á líkamspart, sem sé nú ekki til að hrópa húrra fyrir.

Það eru nefnilega ekki við karlarnir, sem erum að finna að vaxtarlagi og klæðnaði kvenna, það eru hinar konurnar, sem það gera. Þetta er einfaldlega aðferð, sem allar konur nota til að hafa sinn útvalda í friði og engin kona getur hamið þetta eðli. Feministi eða ekki feministi. Eitt sinn kona, ávallt kona.

„Ég skammast mín ofan í tær“

Ekkert tannlæknadrasl inn í skólana!

Margir vita að hér áður var vart finnanlegur grunnskóli í Reykjavík þar sem ekki var tannlæknastóll. Þar var athuguð tannheilsa allra krakkanna og þeir sem það kusu gátu fengið ókeypis viðgerð. Þetta var auðvitað einum of auðvelt fyrir foreldra, svo fyrir nokkrum árum var lokað fyrir þessa þjónustu.

Nú eru tannlæknar aftur að reyna að laumast bakdyramegin inn í skólana með tannbursta og aðrar stórhættulegar gjafir.  Það er gott til þess að vita að þeir hjá Reykjavíkurborg eru vakandi við að vernda börin geng stórhættulegu fólki eins og tannlæknum, sem hafa fleiri andvökunætur barna á samviskunni, en nokkur önnur stétt.

Mega ekki gefa tannbursta í skólum