Hér er sorgleg vísa frá sjónarhóli hrúts!

Þetta með pungana hlýtur að vera viðkvæmt mál frá sjónarhóli hrútsins. Og ekki batnar það eftir að önnur skyld vara kom líka á markaðinn súrsuð.

Hvað um það, í tilefni þorrans orti undirritaður.

Á leið í vinnuna hitti ég hrút,
sem horfði dapur í augun á mér,
sagðist hafa hrokkið í kút
það hefð´einhver étið punginn á sér. 

Þessi er myndarlegur

Unga fólkið sækir í punga

Nei, ekki flytja úr bænum!

Elsku karlinn minn!

Eins og allir vita þá er mjög langt frá því að þú sért neikvæðasti maður í bænum. Til dæmis veit ég um menn, sem sömdu þorrablótsannál Keflavíkur. Þar var sko ekki verið að fara fínt í hlutina og ef höfundar hans eru jákvæðir þá skal ég hundur heita.
Þess vegna bið ég þig að hugsa málið upp á nýtt. Ef þið þessir jákvæðu menn farið að flytja héðan hver um annan þveran þá endar það auðvitað með því að Reykjanesbær verður landsfrægur fyrir neikvæðni. Voru þessir menn ekki bara komnir í glas eða mismæltu sig og voru að meina einhvern allt annan. 

Ósáttur við þorraannál og flytur úr bænum

Besta landsliðið vinnur Dani!

Það er alveg vonlaust að láta Dani vinna allt núna, svona rétt áður en Guðmundur tekur við þjálfun þeirra. Ef maður tekur við liði, sem er á toppnum þá er engin leið upp, en tiltölulega auðveld leið niður. Nú verðum við Íslendingar að standa með Guðmundi og láta hinn sigursæla danska þjálfara, Ulrik Wilbek,  finna hvar Davíð keypti ölið. 

Ólafur segist stoltur af því að keppa með besta landsliði heims og því er sjálfsagt að hafa hann sem mest í leiknum. Það er nú líka svolítið gaman að nýr Ólafur skíni nú skært í liðinu.

Áfram Ísland. 

Hér er kappinn

Stefnan sett á sigur

Geta staðist allt nema freistingar!

Þetta nær auðvitað engri átt. Ráðherrar og forsetar úti um allan heim mega ekki lengur renna hýru auga til kvenna í veislum og þá er einhver búinn að hvísla þessu á netið. Líklegasti aðilin er makinn, sem í gamla daga hefði beðið heima með kökukeflið, en finnur nú verkfæri sem vegur miklu þyngra.

Twitter, facebook og fleiri valda stöðugt meiri vandræðum. Þarna á Indlandi er semsagt hver einasti maður búinn að sjá það á twitter að karlinn hafi verið ótrúr og svo deyr eiginkonan á hóteli og skilur karlinn eftir með margfalda skömm.
Gamla máltækið er í fullu gildi: Ég get staðist allt nema freistingar.

Ráðherrafrú fannst látin á hóteli

Illugi - Nú skaltu spyrja unglingana!

Fyrrverandi menntamálaráðherrar hafa flestir hverjir fallið í þann djúpa pytt að spyrja svokallaða sérfræðinga ráðuneytisins um hvað væri rétt og hvað rangt í menntastefnunni. Niðurstaðan hefur alltaf verið sú sama, að allt væri á réttri leið enda væri farin sú leið sem þeir hefðu lagt til.

Nú má gjarnan sleppa þessum snillingum og spyrja kennarana  sem sitja uppi með það að blanda öllu í sama bekkinn, sem oftar en ekki endar með því að kennarinn er ofurliði borinn og árangurinn er eftir því.

Hvernig væri nú líka að spyrja þessa stráka sem eru að detta út úr kerfinu nánast ólæsir: Ef þú mættir breyta kerfinu í dag svo þú næðir betri árangri, hvað væri það þá. 

Ég veit bara um eitt svæði í Danmörku þar sem allir nemendur voru spurðir um það hverju þeir vildu helst breyta. Yfirgnæfandi meirihluti svaraði því sama og það svar kom öllum sérfræðingum í opna skjöldu. Best að leyfa þér að giska á hvert svarið var. 

Spyrja þarf áleitinna spurninga

Að tjóðra gamalt fólk!

Já, hér er alltaf námskeið fyrir nýtt starfsfólk sagði forstjóri elliheimilisins Áhyggjulaust ævikvöld í viðtali við fréttamann. Á þessu fyrsta námskeiði höfum við fengið skáta til að kenna hina ýmsu hnúta. Pelastikk er að því leyti þrælgóður að hann heldur fólkinu mjög vel föstu í rúminu, en starfsmenn eru fljótir að losa fólkið t.d. ef heilbrigðisráðherra er að koma í heimsókn.
En eins og menn hljóta að sjá þá tekur það tíma að losa hátt í 100 manns. Hestahnútur er hins vegar ekki eins góður því það hefur komið fyrir aftur og aftur að gamla fólkið hefur getað losað sig sjálft og haft þá einu afsökun að það hafi þurft að komast á klósettið. En pelastikk er algjört "must" á nóttunni sagði forstjórinn að lokum.

„Fjötrum“ beitt í öryggisskyni

Kona slasaðist á versta stað!

Ekki er ég viss um að umræddum manni þyki neitt fyndið að hann sé til athlægis á facebook löggunnar. Ég er oft mjög hugsi yfir því hvort það þykir alltaf í lagi að segja frá ýmsu varðandi karla, sem yrði aldrei sagt frá varðandi konur. Þannig þykir t.d. allt í lagi að segja við  karl að hann sé spikfeitur, en ef ég segði það við konu þá þætti meiri dóni vandfundinn. Ég reikna með að fá hér athugasemdir um að þetta sé sko allt í lagi, en veit jafnframt að þeir geta beðið ævilangt eftir frétt af því á facebookvef löggunnar að kona hafi slasast á versta stað og hananú.

 

Læsti klónum í nakinn mann

Háski á hálendinu!

Ég vil byrja á því að setja fram þá frómu ósk að þarna hafi ekki orðið alvarlegt slys. 
Undirritaður var staddur á Kjósarskarðsvegi við Þórufoss, þegar þyrlan flaug yfir. Satt að segja átti ég ekki von á því að menn væru nú á ferð uppi á Kaldadal, en sennilega er sífellt verið að fara með ferðalanga upp á Langjökul. Hálkan er ótrúlega mikil núna og margir vegir samfelldur svellbunki.

Vegna frétta af illa búnum bílaleigubílum er vert að hvetja eigendur bílaleiga til að taka nú upp almennilegar upplýsingar til ferðafólks um veðurhorfur og það er ótrúlegur kuldi að hafa ekki nagladekk undir þeim  bílum sem leigðir eru til ferða út á land.

 

Kona meðvitundarlítil eftir bílveltu

Logn á Kjalarnesi?

Á mínu heimili var fólk að dást að þessum snillingum á veðurstofunni, sem alltaf spá rétt dag eftir dag. Sérstaklega var bent á aðvaranir þeirra varðandi Kjalarnes og Hafnarfjall. Ég verð nú að viðurkenna að ég taldi þetta ekki mikla snilld, því það væri alltaf fjárans rok á Kjalarnesi. Til merkis um þetta virðast flestir Íslendingar hafa flúið byggðina sem þar er. Lengi vel hélt ég að fólk af erlendum uppruna væri flest í Efra-Breiðholti, en nú er mér sagt að þeir séu langflesir á Kjalarnesinu.

Eftir að hafa ekið þarna um í haust, þegar hæst fór í 52 metra á sekúndu þá skal ég fúslega viðurkenna að ég er skíthræddur við að leggja í hann þegar ég sé svona frétt eins og hér er og vona að bílaleigur fari nú að standa sig og senda viðskiptavinum sínum aðvaranir í SMS, þegar útlitið er svart.

Óveður á Kjalarnesi

Ruglaðist stundum í talningunni

Þetta var magnað sagði Svanur Már Valsson, fuglafræðingur. Hins vegar varð mér það á þegar ég var kominn upp í 5000 súlur að líta aðeins af hópnum og mundi svo ekki hvar ég hafði verið. Það kann því að vera að þetta hafi verið eitthvað örlítið færri en 12.000 súlur. Kannski 11.999 eða 11.998

Svo var þarna alveg ótrúlega mikið líf fyrir utan súlurnar. Til dæmis sá ég tvo bleika fíla og hjónin á Eiði voru þarna líka með familíuna. Þau voru með rúgbrauð og kipptu svo upp einni og einni síld á brauðið.

Kannski kom mér mest á óvart að sjá þarna hrossagauka og nokkrar kríur með unga, en satt að segja kemur fátt á óvart í Kolgrafarfirði sagði Svanur Már Valsson að lokum.

Taldi tólf þúsund súlur

Já, en hvað með Hraðfréttir!

Það er verulega sorglegt að ekki eigi að skera meira niður hjá RÚV. Þar finnast dagskrárliðir sem nauðsynlega þarf að losna við. Fyrst vil ég þó losna við hinar aumu Hraðfréttir, sem verða vitlausari og vitlausari með degi hverjum. Á meðan Hraðfréttir með öllum sínum fíflagangi fá að vera óáreittar þá mun ég harma það að ekki standi til að skera meira niður hjá RÚV.

Ekki frekari niðurskurður hjá RÚV

Atvinnuleysi á upptök sín í grunnskólanum.

Ég hef í þrjósku minni sett mér það takmark að menn einhendi sér í það að bjarga náminu í efstu bekkjum grunnskóla. Það þarf engan snilling til að sjá að ólæs krakki megnar ekki að gera neitt af viti í framhaldsskóla. Ungur maður eða ung kona, sem hefur flosnað upp í framhaldsskólanum og getur ekki sýnt neitt prófskírteini, þau hafa ekki um auðugan garð að gresja á vinnumarkaði.

Svo dynja uppsagnir á fólki, sem hefur til dæmis unnið í fiski. Fæst af því fólki er langskólagengið og atvinnuleitin verður í takt við það. Því segi ég enn og aftur:
 Atvinnuleysi á upptök sín í grunnskólanum.

92 sagt upp í hópuppsögnum

Beittir hnífar og uppþvottavélin

Ég vil byrja á því að setja fram þá einlægu ósk að stúlkunni, sem hér er sagt frá batni hratt og vel. Nú er einmitt þetta tímabil, þegar fólk prílar upp á borð og stóla til að gera hreint og skreyta svo allt getur gerst.

Ég hef lengi hatast við það hér heima, þegar oddhvassir hnífar eru settir í hólfið í uppþvottavélinni og oddurinn snýr upp. Ekki veit ég hversu oft ég hef tekið hnífa þaðan og sett þá hættulegustu flata í efri grindina. Ekki get ég sagt að menn hafi alveg skilið þessa hræðslu og talað um hnífafóbíu. En engu að síður finnst mér þetta stórhættulegt t.d. ef lítil börn koma að vélinni hálfopinni og fara að fikta þar sem beittir hnífar blasa við. Ég held að langflestir setji beittu hnífana þarna líka, en vissulega er hægt að breyta því.

 

Stúlka féll á eldhúshníf

Enginn vandi að gera krakkana læsa!

Miklir spekingar hafa m.a. mætt í Kastljós og segja vandann flókinn og vandfundinn. Þetta er auðvitað algjör endaleysa. Vandinn varðandi ólæsi unglinga liggur í augum uppi. Lestrarkennslan er bara ekki nógu góð m.a vegna þess að lesefnið höfðar ekki til krakkanna.

Ef við tökum dæmi frá 1990 þá urðu nánast allir læsir.  Skólatími yfir daginn var þá mun styttri og sumarfríið lengra. Samt gekk þetta svona vel.

Ein að ástæðum þess að svona illa er komið eru hundleiðinlegar bækur. Það fór verulega að halla undan fæti þegar feministar fóru að rífast yfir þessari setningu: Í gær fór Nonni með afa sínum á sjó og þeir drógu marga fiska. Feministarnir urðu bálvondir yfir því að Gunna hefði ekki líka farið á sjóinn og svona bækur voru teknar úr umferð.

Já, vandinn er ekki flókinn. Sá sem þetta skrifar kenndi lestur í mörg ár fram undir árið 2000 og ætti því að vita örlítið um það hvað hann er að segja. 

Mesti vandinn er þó sá að nú þykir hvaða villingur sem er eiga fullan rétt á því að eyðileggja námið fyrir öllum hinum í bekknum og ómældur tími fer í að sinna þessum erfiðustu. Þetta heitir á fagmáli: Skóli án aðgreiningar. 

Mættu vera skemmtilegri bækur