Góðmennska Vodafone og Símans er takmarkalaus

Vá! Ég er gjörsamlega orðlaus yfir þeirri takmarkalausu góðmennsku sem Síminn og Vodafone sýna almenningi í þessu landi.

Þeir bjóða nú upp á stórkostlega nýjung þ.e.a.s. hindrunarlausan aðgang að internetinu. Eins og allir vita þá hafa hindranir verið í hverju horni og fólk hefur nánast hvergi náð netsambandi á sínar nýju græjur.

Nú geta menn glaðst yfir því að geta jafnvel náð sambandi við netið þó þeir séu ekki fastir við snúru innanhúss. Ég hafði heyrt eitthvað rætt um þráðlaust samband, en trúi því varla að þessi fyrirtæki standi við þessi stóru orð. Vonandi er þetta ekki aprílgabb.

Nýjar leiðir hækka verð gagnamagns

Banna almenningi að kaupa lestrarbækur

Sú frétt berst nú eins og eldur í sinu að grunnskólakennarar hafi farið þess á leit við bókabúðir að enginn geti fengið það keyptar lestrarbækur nema sanna að hann sé með kennararréttindi. Sagt er að þeir telji að fikt ólærðra við lestrarkennslu geti haft óbætanleg áhrif á barnið og þetta sé sennilega orsök þess hversu margir strákar enda grunnskólann illa læsir.

Svo var líka að heyrast að píparar vilji hindra að leki, stíflur og ryð myndist í rörurm landsmanna en talið er að allt slíkt stafi frá ófaglærðum, sem hafi m.a. leigt sér snittvélar í Byko. Það er alveg ómetanlegt þegar fagfólk hefur þannig vit fyrir okkur vitleysingunum og fórnar eigin hagsmunum í okkar þágu. 

Bannað að leigja almenningi

Að vinna hug og hjörtu!

Sigrar eru margskonar. Þótt íshokkístelpurnar okkar ynnu ekki keppnina, sem fram fór í Laugardalnum þá var stórkostlegt að hafa lið frá 5 þjóðum í húsinu. Og þarna var samankomin æska þessara landa með tilheyrandi glaðværð og skemmtilegri framkomu. Einhver stærsti sigur, sem hægt er að vinna er að vera sjálfum sér og landi sínu til sóma. Þannig var það með alla þessa hópa og aðdáunarvert hvernig Akureyringar hafa rifið þetta upp með glæsilegri aðstoð frá ungri snót sem hingað flutti frá Kanada.

Til hamingju stelpur! 

Sárt að komast ekki á pall

Næst í Kerið Ögmundur!

Á meðan Ögmundur var ráðherra þá var gaman að hlusta á hann í fréttum. Hann er laginn að hlusta á þjóðina og standa að baki því sem fólkið vill. Ef Ögmundur hefði ekki verið ráðherra þá væri mjög stórt landsvæði á norðausturlandi í eigu Kínverja svo dæmi sé tekið.
Vissulega er mikil þörf á að laga til víða, en einn þúsundkall á hvern farmiða í og úr landi ætti að gefa ótrúlega mikið í slíkan sjóð. Skora á Ögmund að líta við hjá Óskari Magnússyni í Kerinu næst.

Gjaldtöku við Geysi hætt í hádeginu

Súrmjólk í hádeginu cheerios á kvöldin

Miðað við þessa frétt hér þá hefur mataræði landans breyst mjög til hins verra á síðari árum. Það muna allir eftir ljóðinu um  súrmjólk sem var á borðum í hádeginu ásamt cheeriosi á kvöldin.

Samkvæmt þessari frétt hér hefur allt farið mjög á verri veg og vissar fjölskyldur éta hamborgara að kveldi og klára afganginn að morgni. Eins gott að til eru menn, sem fylgjast með og berjast á móti svona háttalagi. Nú fæ ég loks skilið af hverju þjóðin hefur breyst eins og brýrnar frá því að vera einbreið yfir í tvíbreiða.

Hélt dagbók um nemanda

Bætir ekkert að hella í niðurföllin?

Sennilega kunna allir það ráð að hella vatni í niðurföll, sem eru orðin þurr í þvottahúsum og á baði svo minni líkur séu á að svona pest komist inn í húsin. Lagar að vísu ekki upptök fýlunnar en getur hjálpað um stundarsakir. 

Verst er að hraðinn við að byggja mörg þessi hús var svo mikill að maður fyllist ljótum grun um að sums staðar hafi kannski ekki verið gengið alveg rétt frá niðurföllunum. 

Stæk bensínlykt á heimilum fólks

Þegar verkfallsvopnið heggur til baka.

Staða framhaldsskólakennara er satt að segja mun erfiðari en þá sjálfa óraði fyrir. Í hnotskurn er staða þeirra þessi: Æðsti yfirmaður menntamála er þeirrar skoðunar að hann hafi í raun ekkert með þá að gera í fjögur ár heldur  bara þrjú. Á mannamáli þýðir þetta í raun að einhver hluti kennaranna sé að kenna eitthvað sem vel megi sleppa eða hægt sé að dreifa einu kennsluári yfir á hin þrjú.

Ég er dauðhræddur um að forysta framhaldsskólakennara hafi hreint ekki áttað sig á því hversu hrikaleg staða þeirra er. Það væri hreinlega ægileg niðurstaða, ef þeir enduðu með að semja um að það yrði 25% minni vinna í boði í framtíðinni. 

„Það er þungt í okkur hljóðið“

Gunnar Braga beint í eftirlitið!

Nú bar vel í veiði. Gunnar Bragi er staddur í Úkraínu með hermannaklippingu. Þess vegna liggur algjörlega ljóst fyrir hvaða Íslendingur gæti farið beint í þessa eftirlitssveit.  Í viðtali um daginn sagði sonur hans og sumir héldu að Gunnar Bragi væri kjáni, en ég efa ekki að með hetjulegri framgöngu í Úkraínu yrði hann heimsþekktur, þegar hann hindraði innrás Rússa.

Nú ekki yrði vandamál með ráðuneytið hérna heima. Tvær ungar stúlkur voru ráðnar sem aðstoðarmenn hans og víðtæk reynsla þeirra af utanríkismálum mun verða til þess að ráðuneytið mun blómstra í fjarveru Gunnars Braga.

Íslenskir eftirlitsmenn til Úkraínu

Íslensk blöð eiga mikinn heiður skilinn!

Fyrir nokkrum árum varð þvílík breyting í íslenskri blaðamennsku að því verður ekki með orðum lýst. Ég man þegar Fréttatíminn hóf göngu sína og þar var rætt við venjulegt fólk. Fyrst og síðast var rætt við fólk sem hafði barist við allskyns erfiðleika. Síðan liðu mánuðir og allt í einu breyttist gamalgróin lesbók Morgunblaðsins og varð að Sunnudagsblaði, þar sem sama lögmál ræður ríkjum.

Þessi breyting er ólýsanlega mikilvæg. Innst inni langar svo marga að segja sögu sína, ef hún kynni að hjálpa öðrum sem glíma við það sama. Það ber að þakka þann vettvang, sem nú hefur opnast.

Gangi þér vel Ingólfur! 

Glímir við kvíðaröskun

Þá skal ek nú, segir hún, muna þér kinnhestinn

Varla vefst það fyrir neinum hvaðan fyrirsögnin er fengin. Hún kom upp í hugann, því ónefndur prófessor í hagfræði hefur verið óþreytandi við að rita um landbúnaðarmál og t.d. nýverið um okurverð á rjóma. Nú er lag fyrir bændur að spyrjast nánar fyrir um kjör þeirra, sem starfa við háskóla. Að vísu eru það kennarar þar sem voru að greiða atkvæði um hugsanlega verkfallsboðun.

Bændur gætu samt byrjað á prófessorum og spurt ósköp blíðlega hver sé lægsta kennsluskylda þeirra.  Kannski mætti auka kennsluskyldu þeirra og bæta kjör kennaranna.

 

Háskólakennarar samþykkja verkfall

Grasblátt!

Það verður skemmtilegt að sjá þyrlur gæslunnar í nýjum lit. Ég er að velta því fyrir mér hvaða litir hafi komið til greina, en hér segir í fyrirsögn að þær verði appelsínurauðar. Miðað við þetta þá heita litirnir öðrum nöfnum en ég vandist í æsku. Þannig vandist ég því að appelsínur væru gular en ekki rauðar. Gras var á þessum árum talið grænt og kolin, sem menn þekkja ekki lengur voru semsagt kolsvört. Tímarnir breytast og litirnir með.

Þyrlurnar verða appelsínurauðar

Bara veður eins og í gamla daga

Þetta óveður í Dölunum minnir mig á það að eitt sinn var ég á leið suður ásamt húsverði Laugaskóla. Hann var á undan og  á svokölluðu Glerárskógaklifi stoppuðum við enda var svona tveggja metra skyggni. Skyndilega tekur hann sig til og bakkar á mig. Ég hrópa á hann hvað hann sé að gera, en þá bendir hann mér á að við séum í örlitlum halla og ég hafi runnið á sinn bíl. Í svona brjáluðu veðri missir maður tilfinninguna fyrir umhverfinu. Það er gott til þess að vita að húsin á Laugum hafa staðið af sér mörg slík veður og vel fer um unglingana, sem þar eru í skólabúðum.

Framrúða fauk úr rútu á Laugum

Hvaða mánaðardag er 17. júní í ár?

Sagan hér um 118 er anzi skemmtileg. Stundum gleymir maður að hugsa fyrst, en spyrja svo. Ég man eftir því í æsku að mæt kona sagði: Hvaða mánaðardag verður aðfangadagur í ár. Nú svo má ekki gleyma hinum hafnfirska kynni sem sagði: Góðir Hafnfirðingar, í dag er 17. júní um land allt. En það er hreint ekki sjaldgæft að menn rugli saman orðunum vikudagur og mánaðardagur og því vert að benda á að þannig hittist á að þjóðhátíðardagurinn verður þann sautjánda í ár.

„Hvað er þá númerið hjá 118?“

Við megum ganga um land

Eftir því sem ég best veit þá skiptir ekki öllu máli hver á landið. Íslensk lög veita okkur ákveðið frelsi til að taka okkur göngutúr víðast hvar. Meira að segja á ekki að vera hægt að banna okkur að tína upp í okkur ber á þeirri gönguför.

Svona lög eru nauðsynleg, því annars gæti maður orðið fangi í eigin landi. Ef slík lög væru ekki fyrir hendi þá gætu þeir í Mosfellsbæ og Kópavogi heimtað skatt af okkur Reykvíkingum um leið og við færum inn á þeirra land svo dæmi sé tekið. Satt að segja er þetta uppátæki þeirra fyrir austan ekkert gáfulegra.

Hverirnir á landi í eigu ríkisins