Auðvitað á að stytta nám!

Forvitnilegt væri að vita hvernig allar þessar kannanir leggjast í Illuga Gunnarsson. Var það ekki bara í gær sem sagt var frá svokallaðri skimun þar sem er afturför í lestri.

Var það ekki fyrir stuttu, sem sagt var að ótrúlega há prósenta unglinga væri illa læs við lok grunnskóla.

Staðan er svo slæm að hún getur varla versnað. Lengra nám kallar ekki endilega á meiri menntun eða meiri vinnugleði. Óheyrilega langt nám getur kallað á námsleiða og slakan árangur.

Hvenær skyldi koma að því að  framhaldsskólar þurfi að setja upp lestrarkennslubrautir á fyrsta ári? 

Ekkert samráð við kennara

Banna býflugnarækt hérlendis!

Er virkilega ekki nóg af skorkvikindum hérlendis þótt menn séu ekki að flytja þau inn í massavís. Hver nýneminn eftir annan gerir manni lífið leitt og birki og víðir er ekki svipur hjá sjón.

Ég veit að vísu að menn ætla sér að fá hunang frá býflugunum, en ég held að Íslendingar hafi fæðst með fóbíu fyrir þessum röndóttu flugum. Frá því ég var krakki hef ég verið sjúklega hræddur við það sem ég kallaði randaflugur, en heita víst hunangsflugur. Ekki bætti það þegar geitungar bættust í hópinn.

Það hefur verið huggun harmi gegn að menn hafa reynt að útrýma þeim búum sem fundist hafa í húsagörðum og húsum, en nú búa sumir við að  nágranninn á  þúsundir flugna, sem hann fagnar og telur það ganga næst mannsmorði, ef maður stuggar við svosem einni sem er á eilífu flugi yfir garðinn hjá manni sjálfum.

P.s. hér er mynd af nýjum landnema, sem hefur eyðilagt hjá mér reklavíðinn. Þetta er lirfa asparglyttu.

 

Býflugurnar sluppu út

Gefum Kínverjum Ísland!

Seint mun ég þreytast á að benda fólki á einhvern gáfaðasta mann Íslandssögunnar. Sá hét Einar og var kallaður Þveræringur. 

Fyrir mörgum öldum síðan þá fór Noregskonungur fram á að fá Grímsey til eignar. Þetta fannst flestum Íslendingum lítið mál, því kóngsi hafði reynst okkur vel, en þá segir Einar: Ef Noregskonungur er með her í Grímsey, er þá nokkuð langt í land til að skikka okkur til, ef við sýnum ekki nægilega hlýðni. Það var eins og hinir vöknuðu af vondum draumi og ekki fékk kóngur Grímsey. - Það var því neyðarlegt, þegar Nupo vildi jörð og hún væri líka kennd við Grím.

Kínverjar geta alveg gleypt okkur í einum munnbita án þess að fá illt í magann, en ætli okkur gæti ekki orðið bumbult. - Spyr sá sem ekki veit. 

Kínverjar vilja kaupa Íslandsbanka

Á vorin kemur fólk með bilaðar gamlar konur!

Ég er áskrifandi að Mogganum. Þar er þessi frétt í dag og ekkert út á hana að setja. Hins vegar fór ég grútsyfjaður - línuvillt og út koma þessi hrikalega setning eins og hér í fyrirsögn. 

Fréttin er frábær til að vekja athygli á því hvernig margir þjónustuaðilar í litlum plássum verða að vera altmuligtmænd og redda allskyns vandamálum ferðamanna að sumri og sinna gömlum konum haust og vetur.

Annars var ég vel vaknaður á öðrum kaffibolla, þegar ég las að einhverjar væru orðnar slitnar og bilanagjarnar. Kveikti strax á því að þar væri átt við bifreiðarnar frá óábyrgum bílaleigum en ekki gömlu konurnar á Patreksfirði.

Leigja bíla sem ekki eru boðlegir

Niðrandi orð um reiðfatnað.

Nú veit ég ekki hvaða orð þessir dómarar hafa haft um hrossin, en ég hef verið að horfa aðeins á sýningar t.d. ístöltið í vetur.
Það sem hefur helst vakið athygli mína eru reiðfötin. Ekki verður annað séð en þeir sem selja fatnaðinn hérlendis hafi verið að selja svikna vöru. Það var t.d. greinilegt í ístöltinu í vetur að fötin höfðu hlaupið illilega í þvotti svo það hefur verið stórkostlegt vandamál að ná að hneppa að sér brókinni og mátti þakka fyrir að saumar gáfu sig ekki á maga, lærum og rassi. Það verður að taka þessa menn, sem selja reiðfatnað og gefa þeim einn gúmoren. Svona háttalag gengur ekki lengur.  

„Þetta er hið leiðinlegasta mál“

Ófært að kalla leiðina Þröskulda!

Mikið hlökkuðu menn til, þegar þeir þurftu ekki lengur að aka þennan leiðindaveg um Tröllatunguheiði. Nýr vegur kom um Arnkötludal og menn reiknuðu með að hann yrði alltaf fær. Þetta er reyndar frábær, beinn og breiður vegur og fyrst eftir að hann var tekinn í notkun þá heyrði ég aldrei minnst á ófærð.

Það eru duttlungar örlaganna að eftir að heimamenn kröfðust þess að vegurinn yrði kenndur við þröskulda þá mynduðu veðurguðirnir hina og þessa þröskulda allt fram á vor. Væri nú ekki bara rétt að tala um veginn um Arnkötludal aftur og sjá hvað veðurguðirnir gera í málinu.

http://esv.blog.is/img/tncache/300x300/da/esv/img/233062229.jpg

Ófærar heiðar á Vestfjörðum

Af hverju getur kanill verið hættulegur?

Allt er best í hófi segir máltækið. Þeir eru þó til sem trúa því að kanill sé mikið undrameðal og geti jafnvel læknað mann af sykursýki 2. Ef ég segði ykkur að kanill gæti tuttugufaldað einhverja líkamsstarfsemi mundi ykkur þá lítast á blikuna. 

Þannig er þetta nefnilega með kanil. Engan skyldi því undra að það geti verið hættulegt að gleypa fulla matskeið af þessu efni. Glúkósi (blóðsykur) er bráðnauðsynlegur öllum frumum. Hann á að síast inn í frumurnar í mestu rólegheitum, en það er einmitt glúkósinn sem kanillinn hefur svona mikil áhrif á. Já, kanill getur aukið efnaskiptin hjá glúkósa tuttugufalt. Engin furða að hann geti breytt einhverju varðandi sykursýki 2, en í því tilfelli hafa frumurnar ekki fengið nægan glúkósa. 

Þeir sem halda því fram að kanill geti dregið úr magni blóðsykurs hafa því ekki rétt fyrir sér heldur verður upptaka frumanna svo hröð að minna verður eftir af blóðsykri í æðakerfinu. - 

„Þetta er ekki svalt, þetta er hættulegt“

Fáránlega langt nám

Einu sinni enn leyfi ég mér að benda á að það er nánast orðið ævistarf að læra að verða kennari eða leikskólakennari. Hver á að standa í því að læra í 9 ár (menntaskólinn meðtalinn) til að þiggja fáeinar krónur fyrir mjög erfitt starf. Þótt menn hafi löngun til að vinna með börnum þá hljóta að vera takmörk fyrir því hvað fólk lætur bjóða sér.

Yfirvöld ættu að skammast til þess að stytta námið aftur. Þrjú ár eftir menntaskóla er feykinóg, það vitum við sem urðum kennarar eftir ennþá styttra nám og höfum bara staðið okkur þokkalega við að uppfræða íslenska æsku. 

Færri vilja verða leikskólakennarar

Fjögurra ára nám verður níu ár

Geggjunin er algjör. Það er ekki bara hrunið sem er ein allsherjar geggjun. Af einhverjum ástæðum mæla formenn stéttarfélaga sífellt með lengra námi á þeim forsendum að þá verði laun fólksins hærri.

Hvenær skyldu þessir formenn setjast niður og athuga hvað fólkið á að gera að loknu námi.
Tökum dæmi: Kennari sem á að kenna lestur, þarf hann 5 ár í háskóla. Leikskólakennari, sem á að kenna stafina A og B þarf hann 5 ára háskólanám.

Undirritaður lauk á sínum tíma landsprófi og var svo fjögur ár í Kennaraskóla. Nú þurfa menn fjögur ár í menntaskóla fyrst og ég held það sé pottþétt að svo bíði manna 5 ár í háskóla. Ekki veit ég betur en ég og mínir jafnaldrar hafi flestir orðið farsælir grunnskólakennarar. Launin eru svo annar kapituli og koma því í raun ekkert við hvaða nám okkur nægir til að sinna þörfum grunnskóla- og leikskólabarna.

260 þús. eftir 4 ára háskólanám

Friðarsúlan er Gaga

Ennþá einu sinni er komið að því að Orkuveitan sói peningum með því að senda ljósgeisla þvert yfir himininn. Af hverju í ósköpunum þarf að spilla fegurð himinsins ár eftir ár. Skyldu menn ekki átta sig á því hvað geislinn er bjartur hérna niður við sjó rétt hjá Viðey.

Einu sinni hafði ég gaman af því að kíkja á stjörnumerkið Karlsvagninn, en ekki lengur. Þessi gervigeisli frá þessari svokölluðu friðarsúlu liggur beint í gegnum merkið séð heiman frá mér. Eitt árið enn bið ég um að menn leyfi fegurð himinsins að njóta sín án mengunar gervigeisla

Lady Gaga er farin

Tjaldgestir ekki fullir lengur

Það er hundfúlt að nú er búið að breyta þessari frétt. Það vill til að ég á hana eins og hún var í gær, en þá var hún svona.............
---------------- Úrhelli og rok er í Hvanngili á Rangárvallaafrétti nú í kvöld. Enginn gestur gistir þar á tjaldstæði í kvöld, þeir færðu sig allir inn í skála og eru þeir báðir fullir að sögn skálavarðar.

Nú er það tekið skírt fram í fréttinni að það séu skálarnir sem eru fullir og ég reikna þá með því að það sé runnið af tjaldgestum.

Tjaldgestir fóru allir inn

Kerlingarnar 3 munu útrýma kokkum úr grunnskólum

Ekki veit ég hversu oft hefur verið vitnað í þessar 3 kerlur. Eins og allir vita þá hafa þær ekkert betra að gera en rífast yfir kjötbollum og öðrum álíka óþverra sem kokkar í grunnskólum bera á borð.
Eins og allir vita þá eru kjötbollur stórhættulegur matur, en annað má segja um kálhausa sem æskilegt væri að hvert grunnskólabarn stífði úr hnefa í alla mata.

Staðreyndin er að allir sem vinna við mötuneyti grunnskólanna þeir hafa það að leiðarljósi að börnin fái hollan og góðan mat. Sífelldar tilvitnanir í spekinga, sem fitna eins og púkinn á fjósbitanum við það eitt að sjá nafnið sitt á prenti - þær eru ógnun við þá fáu sem eftir eru í mötuneytunum, en þar hefur niðurskurðarhnífnum svo sannarlega verið beitt.

Matur án eftirlits

Fann ekki Bankasýsluna

Eftir vandlega íhugun hef ég ákveðið að taka ekki að mér starf forstjóra Bankasýslunnar. Satt að segja kemur þessi ákvörðun mín ekki til af góðu. Ég kunni ekki við að opinbera vanþekkingu mína, en ég hreinlega fann ekki Bankasýsluna. Það næsta sem ég komst var Barðastrandasýsla og hún er of langt í burtu. Hvar í ósköpunum getur hún verið? 

Páll tekur ekki starfið

Veist þú af hverju hundar hata bréfbera

Hundar eru merkilegt fyrirbæri. Minn var ótrúlega fljótur að átta sig á því að bréfberinn var rauðklæddur. Síðan lætur hann ófriðlega, ef hann sér rauðklætt fólk nálgast húsið. Svo eru hundar svo þefnæmir að þeir mundu gelta á bréfberann þótt það væri bundið fyrir augun á þeim.

En það þykir sannað hvað gerir hundana svona æsta. Venjulegur gestur kemur að húsinu, hringir og honum er vel tekið af húsráðendum. Bréfberinn gengur að húsinu, fiktar í bréfalúgunni og fer svo án þess að nokkur komi til dyra og fagni honum. Þetta tekur hundurinn þannig að bréfberinn sé óvelkominn og ætlar svo sannarlega að hjálpa eiganda sínum að fæla hann burtu. Það er því hægara sagt en gert að kenna hundum að bréfberinn sé hið besta skinn og sé að vinna mikilvægt starf.

Ég verð að viðurkenna að ég hef mikla samúð með bréfberum, enda hefur hundum fjölgað gífurlega á undanförnum árum.

Hundur beit bréfbera