Hefði átt að segja eina og hálfa milljón á mánuði!

Það er auðvitað agalegt, ef fólk verður bálreitt, ef menn nefna töluna hálfa milljón í mánaðarlaun. Ég hélt satt að segja að það væri miklu líklegra að fólk yrði reitt yfir því að missa af flugi og jafnvel tengiflugi. En úr því að menn eru reiðir yfir þessu þá hefði auðvitað verið miklu betra að nefna einhverja þokkalega upphæð t.d. eina og hálfa milljón svo það syði almennilega á fólki. Í þessum málum dugir ekkert hálfkák.  En auðvitað er tónninn orðinn harðari. Þessar verkfallsaðgerðir koma auðvitað mjög illa við marga og það skal viðurkennt að maður segir ekki: Þessir yndislegu menn verða í verkfalli á morgun, svo ég missi af flugi, en það er svosem allt í lagi. Nei, tónninn er harðari

„Þetta hleypir illu blóði í mitt fólk“

Þá verður sumarið gott!

Það má enginn misskilja þessa fyrirsögn. Með henni er átt við að þá verði sumarið vonandi mjög ánægjulegt fyrir Guðna sjálfan. Tuddaskapur og hanaslagur einkennir svo íslensk stjórnmál að Guðni hlýtur eiginlega að vera búinn að fá miklu meira en nóg.

Annars er það auðvitað þungur róður að glíma við alla þá sem eru í borgarstjórn og þykjast aldrei nota bíla. Merkilegt hvernig er hægt að snúa öllu á haus og þrengja og þrengja götur eins og Borgartún þangað til menn flýja á næstu götu og þá er hún þrengd líka eins og nú mun standa til með Sæbrautina.

Gleðilegt sumar Guðni. 

Guðni gefur ekki kost á sér

Í lagi með Gísla en ekki Þóru

Það er svosem hægt að þola það að Gísli Marteinn fari af landi brott. Það verður að vísu erfitt að lifa hér án hans, en samt verður maður að þrauka. Hitt er svo annað mál með Þóru. Hún hefur verið algjört "must" í Útsvarinu. Komið hefur ljós að undanförnu að það er hægt að skipta körlunum þar út, en það var gleðiefni þegar hún mætti aftur eftir forsetaslaginn. Ætli þau geti ekki skipt hún og Sigmar. Þá á ég við að hann verði sendur í Yale og hún taki einhver námkeið hér heima og verði áfram á skjánum.

Þóra Arnórs á leið í Yale

Verð að klára allt vínið fyrir laugardaginn.

Í þessum hasar gleymdi ég því alveg að það er líka opið á laugardaginn í vínbúðunum. Ég ætlaði að byrja létt uppi í bústað og klára þessar 48 dósir af páskabjórnum, en nú sé ég að það er óþarfi að vera að byrja svona rólega enda verðum við 4 fullorðnir svo við förum létt með þetta.

 Ætli maður klári ekki bara þessar fjórar hvítvínsflöskur með laxinum í kvöld og vakni snemma til að rétta sig aðeins af. Þrjár rauðvín með hangiketinu annað kvöld og snögg ferð í bæinn eftir meiru á laugardaginn. Skál fyrir Heiðrúnu.

Löng biðröð eftir víni

Ekkert sagt af viti á fundi eldri borgara

Já, það var vissulega fundur hér í félaginu sagði Tóta og gamla fólkið kom með allskyns tillögur. Ég sagði því hins vegar að hér mætti ekki samþykkja neina tillögu, það væri eingöngu leyft að vísa þeim til stjórnar annars gæti allt farið í tóma vitleysu. Hugsið ykkur, sagði Tóta, hér er auðvitað algjört lýðræði, með svona öryggisventli.

Nú svo kom fram tillaga um vantraust á okkur. - Já, fáránlegt ekki satt, vantraust á okkur, sagði Tóta og eldroðnaði af vandlætingu. Auðvitað neitaði fundarstjóri að taka fyrir svona heimskulega tillögu. Ég sé ekki að neitt sé að hjá okkur, sagði Tóta og glotti við tönn.

„Þetta var stormur í vatnsglasi“

Víða farið illa með eldri borgara

Það þekkja það allir að það hefur verið okrað svínslega á eldri borgurum. Þannig hafa margir þeirra nánast verið plataðir til að selja stóreignir til þess eins að setja söluverðið í litla íbúð, sem hefur verið seld á okurverði vegna þess að hún væri nærri einhverri þjónustu. 

Svo fallast mönnum hendur er þeir heyra leiguverð íbúða hjá DAS. Nú berast af því fréttir frá Hornafirði og Kópavogi að þar sé pottur brotinn og undanfarna daga hafa fjölmargir íbúar hjá Eir verið að skrifa undir eitthvað sem varla verður kallað annað en nauðasamningur. Því miður eru allar líkur á að þessi mál séu miklu víðar í algjöru rugli.

Harmi slegnir íbúar

Betra er á fjöllum konum og "köllum."

Maður les um Vilborgu Örnu og hugsar um nafna hennar örninn, en þau vilja alltaf vera sem hæst uppi. Svo kemur allt í einu upp í hugann gamalt og gott ljóð, sem er kennt við Kerlingarfjöll.
Þar er meðal annars að finna þessar línur við lagið Waltzing Mathilda.

Vinnirðu á skrifstofu
daginn út og daginn inn
doðranta fyllandi stóra og smá.
Hundleiður orðin
á öllu þessu auminginn,
æddu til fjalla og þá muntu sjá:
Að betra er á fjöllum
konum og köllum
koma þau öllum að nýju í lag.
Vistin á öræfum 
eykur fjör og styrkir þrótt.
Öræfin munum við gista í nótt.

Vilborg komin í grunnbúðir Everest

Gæti endað með skelfingu!

Það er aldrei að vita hversu langt þessir áhangendur Liverpool geta gengið. Þannig vildi ég ekki vera í sporum mágsins, ef langt er liðið á leik og hann ekki sofnaður. Upp í hugann koma myndir af konu sveiflandi trékjullu eða í versta falli slaghamri. Svo er ég aðdáandi Agöthu Christie svo ég sé fyrir mér sveflyfi, sem er laumað í bjórinn rétt fyrir leik.

Sennilega öruggast fyrir máginn að flytja aftur til Bretlands með hraði.

 

Tryggir mágur Liverpool titilinn?

Eru einhver hótel í Kópavogi?

Mér finnst endilega að það hafi verið þann 1. apríl, sem Gísli Marteinn var að fjalla um ferðamál og minntist lítillega á Kópavog í því sambandi. Og ég tók þetta eins og hvert annað grín.

En þegar ég fór að hugsa betur þá mundi ég hreinlega ekki eftir neinu hóteli í Kópavogi og þótt ég sé nú enginn sérfræðingur þá bendir þetta allavega til að markaðssetning Kópavogs, sem spennandi viðkomustaðar virðist vera léleg. 

Ætla ekki að bjóða Gísla Marteini í helgarferð

63% þjóðarinnar í fýlu!

Eru ekki Íslendingar meira eða minna í fýlu út í allt og alla. Það má því þakka fyrir að það séu aðeins 63%, sem segjast óánægð með Sigmund Davíð. Hann nennir ekkert að hlusta á þennan vælugang og er ófeiminn að segja mönnum það hreint út að þeir séu bara að reyna að skapa vandræði.

Mér fyndist skemmtilegast ef hann lýsti því bara yfir að þetta óánægða lið geti bara étið það sem úti frýs og fengi enga lækkun á höfuðstól lána.

63% óánægð með Sigmund Davíð

Vallarstarfsmaður kemur illa undan vetri!

Þetta lítur illa út sagði Kristinn V. Jóhannsson, vallarstarfsmaður á Laugardalsvelli sem kemur illa undan vetri. 
Það voru tekin sýni og þau send í greiningu. Þau líta ekki vel út og það er eins og allt sé dautt,“ segir Kristinn.

Ég er ekki hissa á því þótt maðurinn sé sjokkeraður. Ekki vildi ég lenda í svona uppákomu það veit sá sem allt veit. Ég mundi allavega biðja um áfallahjálp.

Gott vor er grassins eina von

Er ekki komið nóg!

Ég harma þetta slys fyrir norðan. Vissulega hlýtur það að virka spennandi að vera fluttur upp á fjallatoppa og fá að renna sér niður. Spurningin er þó hvort skipuleggjendur og ferðalangar gera sér nokkra grein fyrir þeirri áhættu, sem þeir taka. Allir vita að skyggni getur verið afleitt til fjalla svo maður greinir tæpast hæðir og hóla og nýleg slys á snjósleðum sanna að menn geta allt í einu lent í því að falla marga metra af því þeir sáu einfaldlega ekki hættuna framundan. Síðan vita auðvitað allir að ferð á skíðum og snjósleðum utan alfaraleiða geta komið af stað snjóflóðum.

Hvar eru takmörkin?

Skíðakonan komin í þyrlu

Heilaþvottur hjá Landsvirkjun

Það er við fyrstu sýn óskiljanlegt að Þórunn, Álfheiður og Skúli hafi verið kjörin í stjórn Landsvirkjunar að tillögu Bjarna Ben.
Svo spyr maður sjálfan sig. Hafa þau þá lofað að vera góð og ekki vera með neitt vesen á móti ríkisstjórninni. Svo er auðvitað mögulegt að Bjarni eigi sér þann draum að hann geti heilaþvegið þetta vinstri lið og gert það að öfgafullum virkjunarsinnum, sem berjist fyrir fleiri virkjunum í Þjórsá . Sennilega er þetta þó síðbúið aprílgabb.

Jónas Þór nýr stjórnarformaður

Sullaveiki, salmonella og hringormar!

Það er rétt að minna á í þessu sambandi að það er bráðnauðsynlegt að sjóða og steikja vel bæði svína- og kjúklingakjöt. Það er hins vegar orðið lítið um að fólk borði kjöt af sel, en ef ég man rétt þá er hann einn helsti hýsill fyrir hringorminn, sem aftur fer svo yfir í fisk. 

Svo verð ég að viðurkenna að ég er skíthræddur um að  þessi hundaskítur um allan bæ verði til þess að aftur taki sig upp bandormur og þar með sullaveikin sem lék marga grátt hér áður fyrr. Því miður eru ekki nálægt því allir hundar skráðir og því fá þeir ekki allir ormalyf. 

Hér skal svo bent á stórmerkilega grein úr læknablaðinu 

Hringormur veldur bráðaofnæmi